Ներկայումս Հայաստանի (ներառյալ Արցախը) սահմաններից  դուրս գոյություն ունի մեր պատմական Հայրենիքի` Հայկական լեռնաշարհի մաս կազմող միայն մեկ երկրամաս, որտեղ համախումբ բնակվում են հայերը: Դա Ջավախքն է իր հարակից շրջաններով:

Ըստ վրացական պաշտոնական վիճակագրության հայերը կազմում են Սամցխե-Ջավախքի նահանգի բնակչության շուրջ 60 %-ը, բուն Ջավախքում բնակչության շուրջ 94%-ը (Ախալքալաքի շրջանում` 57,500  եւ Նինոծմինդայի (Բոգդանովկայի) շրջանում` 32,900 մարդ): Ծալկայի շրջանում հայերը կազմում են բնակչության շուրջ 55 %-ը (11,500 մարդ): Ամբողջ Վրաստանում բնակվում է շուրջ 250,000 հայ:  

Մի շարք սոցիալ-տնտեսական, կրթամշակութային եւ հոգեբանական գործոնների հետեւանքով ջավախքահայությունը լքում է իր հայրենիքը: Արտագաղթին նպաստում է նաեւ վրացական իշխանությունների կողմից ազգային փոքրամասնությունների նկատմամբ տարվող խտրական քաղաքականությունը: Ոտնահարվում են հայ փոքրամասնության քաղաքական, քաղաքացիական, լեզվական, կրթական եւ կրոնական տարրական իրավունքները:

Իրավիճակի նման տեմպերով զարգացման ընթացքն անխուսափելիորեն հանգեցնելու է երկրամասի հայաթափման: Դա արդյունքն է լինելու ինչպես սոցիալ-տնտեսական ծանր իրավիճակի, որը մոտակա ժամանակներում բարելավվելու որեւէ հեռանկար չունի, այդպես էլ այլ գործոնների, որոնցից հիմնականներն են` հայերենով տեղում բարձրագույն ուսուցում ստանալու հնարավորության բացակայությունը, հայկական կրթությամբ աշխատանք գտնելու անհնարինությունը, վրացական իշխանությունների վարչա-տնտեսական ճնշման հետագա ուժգնացումը եւ այլն:

«Երկիր» միությունը գտնում է, որ նկատի ունեանլով Վրաստանի եվրոպական եւ եվրաատլանտյան կառույցներին անդամակցելու ցանկությունը եւ այդ նպատակով  արեւմտյան ժողովրդավարական չափանիշները ստանձնելու հրամայականը, ջավախքահայության եւ վիրահայության իրավունքների համար մղվող պայքարում պետք է առաջնահերթությունը տալ մարդու եւ փոքրամասնության իրավունքների պաշտպանության գծով Վրաստանի ստանձնած պարտավորությունների իրականացման պարտադրմանը:  Ուստի, մեր կազմակերպությունը շեշտը դնում է Վրաստանում հայ բնակչության որպես էթնիկական փոքրամասնության իրավունքների պաշտպանության վրա, եւ մասնավորապես`

-    էթնիկ հայերի համախումբ բնակության տարածաշրջաններում` Սամցխե-Ջավախք նահանգ, ինչպես նաեւ Քվեմո-Քարթլի նահանգի Ծալկայի շրջան, հանրային կյանքի բոլոր ոլորտներում հայերենի օգտագործումն օրենսդրական-նորմատիվ ամրագրմանը

-    Վրաստանում հայ էթնիկ փոքրամասնության քաղաքական, լեզվական, կրթա-մշակութային եւ կրոնական խնդիրներին (Հայ Առաքելական Եկեղեցու որպես հանրային իրավունքի սուբյեկտ չգրանցվածությունը, շրջանային եւ կենտրոնական պետական մարմիններում էթնիկ հայ պաշտոնյաների անլիարժեք ներկայացվածությունը, մայրենի լեզվի հիմքի վրա բարձրագույն կրթություն ստանալու հնարավորության բացակայությունը եւ այլն) լուծում տալը:

Այդ նպատակով «Երկիր» միությունն իրականացնում է հետեւյալ ուղղություններով աշխատանքները.

1. Միջազգային ատյանների առջեւ (ՄԱԿ, ԵԱՀԿ, Եվրամիություն, Եվրոպայի Խարհուրդ եւ այլն) վիրահայության եւ ջավախքահայության խնդրների ներկայացում:

2. միջազգային հանրության կողմից. Հայաստանում եւ սփյուռքում ջավախքահայության եւ վիրահայության խնդրի վերաբերյալ իրազեկության մակարդակի բարձրացոմ:

3.  Ջավախքում ժողովրդավարության, քաղաքացիական հասարակության ինստիտուտների կայացմանը,    իրավական եւ ընկերային արդարության սկզբունքների վրա խարսխված հարաբերությունների հաստաման աջակցում:

4. Վիրահայության շրջանակներում հայկական երիտասարդական կազմակերպությունների ստեծման ու զարգացման աջակցում.

5.  Վիրահայության շրջանակներում քաղաքական, տնտեսական, գիտակրթական եւ մշակությաին շահերը արտահյտող քաղաքացիական հասարակության ինստիտուտների կայացման աջակցում:

6.  Վրաստանում գտնվող հայկական  պատմամշակութային հուշարձանների պահպանման ու ուսումնասիրության աջակցում: